Дансран брэндийн нүүр царай - М.Мөнхзултай хийсэн ярилцлага
Бүх сайхан бүсгүйчүүддээ баярын мэнд хүргэе! Бид энэ удаагын блогоороо Дансран брэндийн "Сувдан" коллекцын маань нүүр царай болсон М.Мөнхзултай хийсэн ярилцлагаа хүргэж байна.
Дансран Брэнд: - Юуны өмнө танд Олон улсын эмэгтэйчүүдийн эрхийг хамгаалах өдрийн мэндийг хүргэе. Бидний урилгыг хүлээн авч хүрэлцэн ирсэнд баярлалаа.
М.Мөнхзул: - Баярлалаа. Та бүхэнд ч бас баярын мэнд хүргэе.
Д.Б: - Та өөрийгөө танилцуулаач?
М.М: - Миний нэр Мишигийн Мөнхзул. Гэрлэсэн, 2 хүүхэдтэй. Эм зүйч мэргэжилтэй. БНКуба улсын Гаванагын их сургуулийн эм зүйн факультетыг 2007 онд төгссөн. Эмийн үйлдвэрийн чанарын баталгаажилтын менежерээр олон жил ажилласан. Эмзүйн Мэргэжлээр Төгсөгчдийн Холбоо ТББ-г 2013 онд байгуулж тасралтгүй сургалт зохион байгуулах, гадаад харилцааг хариуцахаас гадна 2022 онд Монголын Скайраннингын холбоо ТББ-ийн гүйцэтгэх захирлаар ажиллаж эхэлснээр тус холбооны менежментийг сайжруулах, олон улсын түвшинд тамирчдыг гаргах, бэлдэх, амжилт гаргах тасралтгүй үйл ажиллагааг хангаж ажиллаж байна. Мөн гурван кафе ажиллуулж, захирал гэхээсээ илүүтэйгээр менежментийн тогтолцоог нь хангаж ажилладаг.
М.М: - Миний хобби бол ууланд алхах, ууланд гүйх юм. Ууланд алхахын тулд маш эрт сэрэх хэрэгтэй. Эрт төлөвлөөд, эрт сэрээд ууланд алхаад ирэхэд өдрийн ажлаа алдахгүй явж болдог. Уулын гүйлт мөн адил эрт төлөвлөж гүйснээр өдрийн ажилаа алддаггүй. Орой оройтлоо гэхэд 22 цагт унтах зарчмыг баримталдаг. Ихэнх ажлаа онлайнаар хийдэг болохоор түгжрэлд цаг алдахгүй, хэрвээ шаардлагатай бол алхаад ажлаа амжуулдаг. Энэ их ажлыг маш сайн төлөвлөдөг, календариа маш сайн хөтөлж чадсанаар бүх төлөвлөсөн ажлуудаа амжуулж, хоббиндоо цаг гаргаж чаддаг.
Д.Б: - Та хэд хэдэн хэлээр чөлөөтэй ярьдаг. Хэл сурахад таны бодлоор юу хамгийн ихээр нөлөөлсөн, юун дээр анхаарвал зүйтэй вэ?
М.М: - Би Куба улсад сурч байсан учраас Испани хэлийг академик түвшинд сурсан. Тэнд сурч байх хугацаандаа Франц хэлийг Alliance Francaise хэлний төвд давхар сурсан. Англи хэлийг оюутан найз нартай ярьсаар байгаад л сурчихсан. Одоо хэлээ мартахгүйн тулд Испани, Франц, Англи хэл дээр мэдээ, кино, артикль, ном уншдаг. Хэл сурахын тулд ердөө ч ичихгүйгээр ярьдаг байсан тулдаа их хурдан сурсан байж магадгүй. Хэл сурахын тулд юу ч хамаагүй л ярих хэрэгтэй гэж би боддог.
Д.Б: - Та бол бизнэс эрхлэгч эмэгтэй. Бизнес хийх санаагаа хэрхэн олсон бэ? Юунаас эхэлсэн бэ?
М.М: - Би 2015 онд кафегаа нээсэн. Хотод маань үнэтэй ресторан эсвэл цайны газар их байсан боловч залуучууд, мөн Монголд байгаа гадаад иргэдийн хувьд ороод хөнгөхөн хоол идээд нэг шар айраг уугаад гарах кафе-бар ховор байсан тул нээсэн.
Д.Б: - Бүсгүй хүнийг гоёл чимэглэлгүйгээр төсөөлөхийн аргагүй. Таны хувьд гоёл чимэглэлийн талаар ямар ойлголт, бодолтой явдаг вэ?
М.М: - Гоёл чимэглэлийг зөвхөн аксессуар хэрэглээ гэдгээр харж болохгүй, энэ бол эмэгтэй хүний эрх мэдэл, хүч чадал мөн тухайн эмэгтэй хүний бие даасан байдлыг илтгэдэг. Гоёл чимэглэл эмэгтэй хүний өөртөө итгэх итгэлийг нэмэгдүүлдэг. Миний хувьд гоёл чимэглэлийг өдөр тутамдаа маш энгийн, гэхдээ чаминг нь хэрэглэх дуртай. Харин үзвэр үзэх болон ямар нэгэн арга хэмжээнд очихдоо тансаг эрхэмсэг харагдахын тулд Дансран брэндийн гоёл чимэглэлийг зүүдэг.
Д.Б: - Бидний урилгыг хүлээн авч цаг гарган ирсэн танд маш их баярлалаа. Танд ажлын өндөр амжилт хүсье!
М.М: - Танай хамт олонд ч мөн ажлын өндөр амжилт хүсье!